دفاع پاکستان کونسل نے نیٹو سپلائی بحالی کی کوششوں کیخلاف 27مئی کو کراچی سے اسلام آباد تک لانگ مارچ ، 25مئی جمعة المبارک کو ملک گیر یوم احتجاج کا اعلان کردیا

لاہور(ہشام چوہان سے)دفاع پاکستان کونسل نے نیٹو سپلائی بحالی کی کوششوں کیخلاف 27مئی کو کراچی سے اسلام آباد تک لانگ مارچ ، 25مئی جمعة المبارک کو ملک گیر یوم احتجاج کا اعلان کردیا ،منصورہ لاہور میں ہونے والے اجلاس میں دفاع پاکستان کونسل کے چیئر مین مولانا سمیع الحق ، سید منور حسن ،حافظ محمد سعید ، جنرل (ر) حمید گل ، مولانا محمد احمد لدھیانوی ، شیخ رشید احمد ، اعجاز الحق ، علامہ ابتسام الٰہی ظہیر ، مولانا فضل الرحمن خلیل ، مولانا امیر حمزہ ، حافظ عبدالغفار روپڑی و دیگر نے شرکت کی،قائدین نے اجلاس کے بعد مشترکہ پریس کانفرنس سے خطاب میں کہا کہ نیٹو سپلائی بحالی کا معاملہ انتہائی حساس اور نازک ہے ہم نے مسلم لیگ (ن) کے قائد نواز شریف ، عمران خان اور مولانا فضل الرحمن کو بھی اجلاس کی شرکت کی دعوت دی تھی تاکہ مل بیٹھ کر متفقہ طور پر پاکستان کے دفاع کیلئے مشترکہ لائحہ عمل ترتیب دیا جائے ۔ انہوں نے کہا کہ سپلائی بحالی کیلئے امریکہ کے غلام حکمرانوں کی جانب سے کی جانیوالی کوششوں کیخلاف دفاع پاکستان کونسل 27مئی کو کراچی سے لانگ مارچ شروع کر رہی ہے جو ملک بھر کے مختلف شہروں سے ہوتا ہوا اسلام آباد پہنچے گا جبکہ 25مئی جمعہ کو ملک بھر میں یوم احتجاج منایا جائے گا شہر شہرمظاہرے کئے جائیں گے اور ریلیاں نکالی جائیں گی علماءکرام اور خطباءحضرات نماز جمعہ کے اجتماعات میں مذمتی قراردادیں پاس کریں گے اور عوام الناس کو اسلام و پاکستان کیخلاف ہونیوالی سازشوں سے آگاہ کریں گے۔